புண்ணியம் பொழிந்த ரமழானே – எமை(ப்)
பிரிந்து நீயும் சென்றாயே
கண்ணியம் மிக்க நோன்பதனை - நீ
கரங்களில் ஏந்தி வந்தாயே!
பண்ணிய பாவக் கறை யகற்றி - எமை(ப்)
பக்குவப்படுத்திச் சென்றாயே
மண்ணகம் மீதில் அருள் சொரிந்து - பின்
மறைந்தாய் ஏன் ரமழானே?
வறியோர் பசிப் பிணியை யுணர்த்தி - நீ
வாரி வழங்கும் உளம் கொடுத்தாய்
பொறுமை யென்னும் பொக்கிஷத்தை – நீ
பிரியமுடனே எமக்களித்தாய்
இரவின் இருட்டை விடிவாக்க – நல்
'அமல்கள்' என்னும் ஒளி கொடுத்தாய்
நரகத்தின் வாயிலை மூடி வைத்தாய் - உயர்
சுவர்க்கத்தின் வாயிலை திறந்து வைத்தாய்
--------------------
புனித 'லைலத்துல் கத்ர்' இரவை - இறுதி(ப்)
பத்தின் ஒற்றையில் ஒளித்து வைத்தாய்
புனித மறையாம் அல்குர்ஆன் - முதல்
இறங்கிய மாதம் நீயானாய்
மனித நேய நற்குணங்கள் - எம்
மனங்களில் ஓங்க வழி சமைத்தாய்
மனதை தூய்மை யாக்க வைத்தாய் - எம்
மெய்யில் நலத்தை அதிகரித்தாய்!
--------------------
ஆத்மீக உணவாய் நீ வந்தாய் - அருளின்
இருப்பிடம் நீ யானாய்
சாத்வீகமாக எமக்குள்ளே – தீமைகள்
ஒழிக்க வழி சமைத்தாய்
ஆத்மீக உணவை அதிக முண்டோம் - பௌதீக
உணவை குறைத்துக் கொண்டோம்
ஆத்மாவின் மதிப்பை உணர்ந்து கொண்டோம் - ஏக
இறைவன் திருப்தியை பெற்றுக் கொண்டோம்
--------------------
ரமழான் தலைப்பிறையில் உதித்தாய் - உயர்
ரத்தின நாட்களை நீ விதைத்தாய்
அமல்களின் களத்தில் குதிக்க வைத்தாய் - எமை
நன்மைகள் கோடி குவிக்க வைத்தாய்
அமைதியை மனதில் ஏவிவிட்டாய் - நல்
இனிமையை குணத்தில் தூவி விட்;டாய்
இமைக்கும் பொழுதில் மறைந்து விட்டாய் - மீண்டும்
எங்களை நாடி நீ வருவாய்!
- கலாநெஞ்சன் ஷாஜஹான்
No comments:
Post a Comment
உங்கள் கருத்துக்கள்